रूवाई–१
कहिले रूप त कहिले सार देखाउँछ
बारम्बार त्यसैले अहंकार देखाउँछ
बटुलेर पसिना जनता सरकार बनाउँछन्
लोकतन्त्रमा महाराजको अवतार देखाउँछ
रूवाई–२
पानीको प्यास दूधले मेटिन्छ भने
एउटालाई छोड्दा अर्को भेटिन्छ भने
शरणार्थी हुन विवश छ मेरो माया
मायाकै देशबाट मायालु लखेटिन्छ भने
रूवाई–३
सम्बन्ध गाँज र गाबो जस्तै हो
दुईबीच चंगा र धागो जस्तै हो
सम्झौता हुँदैन भने विचारहरूमा
एक–अर्का खरानी र आगो जस्तै हो
रूवाई–४
अँध्यारोमा विश्वासको दियो बल्ने छ
कष्टहरू सबै–सबै मेरै अगाडि ढल्ने छ
प्रियसी एक पटक माया मात्र गरेर हेर
अब तिम्रै साथले मेरो जिन्दगी बदल्ने छ
रूवाई–५
कहिले नम्र त कहिले कडा हुन्छ
आफ्नो कुरा सुनाउन उ तगडा हुन्छ
हरदम सोच्दैछु नियती या संस्कार नै यस्तो
क्रान्ति गर्ने नै अन्त्यमा किन लङ्गडा हुन्छ ?
सुमन ल्वागुन ‘क्षितिज’
