मोरङको विराटनगरस्थित कोशी अस्पतालले भर्ना लिन नमानेर फर्काइएकी एक सुत्केरीको बच्चा जन्माउन नसक्दा मृत्यु भएको छ । प्रसुती व्यथाले च्यापेकी उनलाई कोशी अस्पताल पुर्याएकी विराटनगर महानगरपालिका–६ की ३० वर्षीया विमला ऋषिदेवको मृत्यु भइको हो ।
अस्पतालले अन्य अस्पताल लैजान भने पनि निजीमा लैजान उनीहरुसँग पैसा थिएन । निजी अस्पतालमा भर्नाका लागि पैसाको जोहो गर्दा गर्दै बच्चा जन्माउन नसक्दा विमलाको ज्यान गएको आफन्तले बताएका छन् ।
सुकुम्बासी टोलमा बस्दै आएकी विमलाकी ९ र ३ वर्षकी दुई छोरी छन् । अढाई वर्षका १ छोराको १ वर्ष अघि खोलामा डुवेर मृत्यु भएको थियो ।
आफन्तका अनुसार यसअघि दुई पटक शल्यक्रिया गरेर प्रसुती गराइएकी विमलको तेस्रो पटक पनि शल्यक्रिया गर्न नमिल्ने भन्दै कोशी अस्पतालले फिर्ता पठाएको थियो ।
निजी अस्पताल लैजानका लागि प्रयास गरिए पनि खर्चको जोहो हुन नसकेको स्थानीय बताउँछन् । विमलको परिवारसँग अन्तिम संस्कारका लागि समेत पैसा नभएकाले शव उठाउनै समस्या भएको थियो । पछि केही स्थानीयको पहलमा नेपाली कांग्रेसका नेता केदार कार्कीले आर्थिक सहयोग गरेपछि विमलाको अन्तिम संस्कार गरिएको जनाइएको छ ।
यो नेपाली भाषाको अनलाइन पत्रिका हो । हामी तपाईमाझ खासगरी मकवानपुरकाे थाहा नगरपालिका र सँगसँगै तपाईंलाई काम लाग्ने देश-विदेशका समाचार र विचार प्रकाशन गर्छौं । सुझाव, समाचार र विज्ञापनका लागि सम्पर्क : ९७०५०७८९१०
