चितवनमा एक ३३ वर्षीय युवकले श्रीमतिलाई धारिलो हतियार प्रहार गरि आफूले आत्महत्या गरेका छन् । माडी नगरपालिका–९ प्याउलीमा २९ वर्षीया श्रीमती शोभा विकलाई खुर्पाले हानेर घाइते बनाएर श्रीमान धने विकले आत्महत्या गरेका हुन् ।
घरायासी विवादका क्रममा श्रीमतीलाई गएराति खुर्पाले हानेका विक आज बिहान आफ्नै घरमा झुण्डिएको अवस्थामा मृत भेटिएका हुन् । इलाका प्रहरी कार्यालय माडीका अनुसार विकको प्रहार घाइते बनेकी शोभा राति नै माइतिमा गएर बसेकी थिइन् । घाइते अवस्थामा रहेकी शोभाको प्राथमिक स्वास्थ्य चौकीमा उपचार भइरहेको माडीका प्रहरी निरीक्षक हर्कबहादुर विश्वकर्माले जानकारी दिएका छन् । उनको हातका औंला तथा कुहिनामा चोट लागेको विश्वकर्माले बताए ।
श्रीमतिले प्रहरीमा उजुरी गर्न सक्ने भन्ने डरले विकले आत्महत्या गरेको हुन सक्ने प्रहरीको प्रारम्भिक अनुसन्धानले जनाएको छ । मृतक धनेको शवको मुचुल्का तयार गरी पोष्टमार्टमका लागि भरतपुर अस्पताल पठाइएको र घटनाबारे थप अनुसन्धान भइरहेको प्रहरीले बताएको छ ।
यो नेपाली भाषाको अनलाइन पत्रिका हो । हामी तपाईमाझ खासगरी मकवानपुरकाे थाहा नगरपालिका र सँगसँगै तपाईंलाई काम लाग्ने देश-विदेशका समाचार र विचार प्रकाशन गर्छौं । सुझाव, समाचार र विज्ञापनका लागि सम्पर्क : ९७०५०७८९१०
