मल नपाएको भन्दै आक्रोशित किसानहरुले हेटौंडामा सरकारविरुद्ध प्रदर्शन तथा नाराबाजी गरेका छन् । सोमबार मल लिन हेटौंडा बजारको मल बिक्री केन्द्रमा आएका किसानले मल नपाएपछि हेटौंडा बजारको बुद्धचोकमा जम्मा भएर सरकारविरुद्ध प्रदर्शन तथा नाराबाजी गरेका हुन् ।
उनीहरुले नाराबाजी गर्दै तत्काल पर्याप्त मल उपलब्ध गराउन मागसमेत गरेका छन् । किसानले सडकमै प्रदर्शन गरेपछि प्रहरीले किसानलाई सडकबाट हटाएका थिए । कृषि सामग्री कम्पनी लिमिटेड र साल्ट ट्रेडिङ कर्पोरेसनले सहुलियत अनुदानको युरिया मल सहकारीमार्फत् किसानलाई बिक्री गर्दै आएको छ ।
सहकारी संस्थाले भने कृषि सामग्री कम्पनी लिमिटेड र साल्ट ट्रेडिङ कर्पोरेसनले नै कम मल उपलब्ध गराएका कारण कृषकको आवश्यकताअनुसार मल वितरण गर्न नसकेको जनाएको छ । अहिले मकै बालीमा मल हाल्ने समय हो ।
‘बारीमा मकै पहेँलिन थालिसक्यो । मल पाएका छैनौं,’ हेटौंडा–११, किसान बबिम बर्तौलाले भने,‘यसैवर्ष मकैमा फौजी किरा समेत लागेको छ । हामी किसानलाई जहिल्यै समस्या ।’ मलको पर्खाइमा धेरै दिनदेखि बजार धाएको तर मल नपाएपछि बाध्य भएर नाराबाजी गरिएको किसानहरुले बताएका छन् ।
-इ-कान्तिपुरबाट
यो नेपाली भाषाको अनलाइन पत्रिका हो । हामी तपाईमाझ खासगरी मकवानपुरकाे थाहा नगरपालिका र सँगसँगै तपाईंलाई काम लाग्ने देश-विदेशका समाचार र विचार प्रकाशन गर्छौं । सुझाव, समाचार र विज्ञापनका लागि सम्पर्क : ९७०५०७८९१०
