मनहरी–बाढीपहिरोबाट पीडित मनहरी गाउँपालिकाका बासिन्दालाई राहत तथा पुनस्र्थापनाको काम गर्नका लागि जिल्ला बचत तथा ऋण सहकारी संघ मकवानपुरले ७० हजार रुपियाँ हस्तान्तरण गरेको छ ।
एकद्वार प्रणाली अनुसार गाउँपालिकाका पीडितहरुलाई राहत तथा पुनस्र्थापनाका लागि मनहरी गाउँपालिकाले छुट्टै खाता सञ्चालन गरेको थियो । दातृ निकाय तथा व्यक्तिहरुले सहयोग गर्न चाहेमा गाउँपालिकाको उक्त खातामा रकम जम्मा गर्न आह्वान गरिएको पहिलो दिनमै बचत तथा ऋण सहकारी संघले ७० हजार रुपियाँको चेक हस्तान्तरण गरेको हो । गाउँपालिका अध्यक्ष एकराज उप्रेतीलाई संघका सचिव कल्पना श्रेष्ठ तथा अन्य पदाधिकारीहरु मिलेर चेक हस्तान्तरण गरेका हुन् ।
गाउँपालिकाले आइतबार मात्रै बाढीपहिरो पीडितका लागि सहयोग गर्न दातृ निकाय वा व्यक्तिहरुसँग आह्वान गरेको थियो । अध्यक्ष उप्रेतीले एकद्वार प्रणालीबाट राहत बितरणका लागि खाता सञ्चालन गरिएको बताए । सहयोग गर्न इच्छुकहरुले गाउँपालिकाको नेपाल बैँकमा रहेको खाता नं ०२५०३००००००००४००१००६ मा जम्मा गर्न सकिने जनाएको छ । सार्वजनिक आह्वानपछि थुप्रै संस्थाहरुले सहयोगका लागि चासो देखाउँदै फोन गरेको अध्यक्ष उप्रेतीले बताए ।
