थाहानगरको कोभिड–१९ सुरक्षा रणनीति परिवर्तन १५ दिनका लागि नयाँ नियम 

कोरोना भाइरस रोकथाम तथा नियन्त्रणका लागि  मकवानपुर थाहा नगरपालिकाले रणनिित परिवर्तन गरेको छ । नगरका हरेक वडाहरुमा सामुदायिक ट्रेसिङ गरेपछि पिसिआर रिपोर्ट नेगेटिभ आएपछि नगरपालिकाले रणनीति परिवर्तन गरेको नगर प्रमुख लवशेर विष्टले जानकारी दिए । 

थाहा नगर कार्यपालिकाको बैठकको निर्णय अनुसार अव १५ दिनसम्म साँझ ५ बजेसम्म बजार खुलाउन पाइने भएको छ । यसअघि ४ बजेसम्म मात्र बजार खुलाउन पाइने नियम रहेको विथयो । कोभिड–१९ को सुरक्षालाई केही खुकुलो बनाउँदै ५ बजेसम्म बजार संचालन गर्न दिने निर्णय गरिएको नगरप्रमुख विष्टले जानकारी दिए । 

यसअघिको निर्णयमा पुनरावलोकन गर्दै बैंक तथा वित्तीय संस्थालाई २ बजेसम्म संचालन गर्न दिइएकोमा अन्य सरकारी कार्यालयसरह साँझ ५ बजेसम्म नै संचालन गर्न दिने निर्णय गरिएको छ । यसअघिको बैठकमा गरिएका अन्य निर्णयहरु जस्तैः नाकाहरुमा कडाइ गरिने, हेटौंडा–काठमाण्डौं चल्ने सवारीलाई बीचमा रोक्न नदिने, भेला–बैठक बस्न नदिने, फिल्डमा हुने काम गर्न नदिनेजस्ता निर्णयहरु यथावत गरिएको नगरप्रमुख विष्टले बताउनु भयो । 

थाहा नगरपालिकामा २३ भाद्रमा भएको सर्वपक्षिय वैठकले पनि नगरपालिकामा कोरोना भाइरस रोकथाम तथा नियन्त्रणका लागि रणनीतिलाई परिवर्तन गर्नका लागि सिफारिस गरेका थिए । बैठकमा पालुङ प्राथमिक स्वास्थ्य केन्द्रका डाक्टर उदय रोकाले हालको संक्रमणको अवस्थाको विषयमा ब्रिफिङ गरेसंगै सरोकारवालाहरुले सुरक्षा रणनिित परिवर्तन गरी अवस्था खुकुलो बनाउन सुझाव दिएका थिए ।