मकवानपुर थाहा नगरपालिका वडा नम्बर १२ गैरीगाउँमा रहेको ढुङ्गाखानीमा आएको पहिरोमा परी ज्यान गुमाएका ५४ वर्षिय काले मोक्तानको परिवारलाई १५ लाख रुपियाँ क्षति पुर्ति दिने सहमती भएको छ ।
चौध वर्षदेखि सो खानी संचालन गर्ने माइनिङ एण्ड माइनिङ इन्डष्ट्रिज प्रा.लि. मा कार्यरत मोक्तानलाई वर्षको १ लाखका दरले १४ लाख र किरिया खर्च वापत थप १ लाख रुपियाँ दिने सहमती भएको स्थानीय मंगल तामाङले जानकारी दिए ।
ढुङ्गाखानीमा २९ साउन साँझ आएको पहिरोमा परी वेपत्ता भएको मोक्तानको शव ३० साउन विहान स्थानीय र प्रहरीको सहयोगमा फेला परेको थियो ।
यसैबीच मृतक परिवारलाई क्षतिपूर्ति दिने सहमती भएपछि अवरुद्ध त्रिभुवन राजपथ खुलेको छ । स्थानीयहरुले क्षतिपूर्तिको माग गर्दै पहिरो पन्छाउन रोकेका थिए ।
गैरीगाउँको ढुङ्गा खानीमा गएको पहिरोमा परी ७ वटा ट्रिपरमा क्षति पुगेको छ ।
पहिरोमा परी ना ३ ख २५९५, बा ५ ख ६१६४, बा ४ ख २३५६, बा ३ ख ७५५४, बा ४ ख ४६२२, बा ५ ख ८३७८ र प्र–३–०१ ख ४७२१ ट्रिपरमा क्षति पुगेको प्रहरीले जनाएको छ ।
पहिरोमा परी तीनवटा ट्रिपरमा बढि क्षति भएको र बाँकीमा सामान्य क्षति भएको प्रहरीले जनाएको छ । पहिरोमा परी एउटा एक्साभेटरमा पनि क्षति पुगेको छ ।
यो नेपाली भाषाको अनलाइन पत्रिका हो । हामी तपाईमाझ खासगरी मकवानपुरकाे थाहा नगरपालिका र सँगसँगै तपाईंलाई काम लाग्ने देश-विदेशका समाचार र विचार प्रकाशन गर्छौं । सुझाव, समाचार र विज्ञापनका लागि सम्पर्क : ९७०५०७८९१०
