थाहा नगरपालिकामा सातौं राष्ट्रपति रनिङ शील्ड खेलकुद तथा मेयर कप भलिबल प्रतियोगिता आज बिहीबारदेखि शुरु भएको छ । थाहाको इन्द्रायणी चौर खेलकुद मैदान, निर्माणाधीन कभर्ड हल र पालुङ क्याम्पसको मैदानमा विभिन्न विधाका खेलहरु सञ्चालन भइरहेको छ ।
थाहा नगरपालिकाका प्रमुख विष्णुबहादुर विष्टले एक समारोहबीच प्रतियोगिताको उद्घाटन गरेका थिए । उद्घाटनमा बोल्दै उनले खेलकुदको माध्यमबाट राष्ट्रिय तथा अन्तराष्ट्रिय क्षेत्रमा थाहानगरलाई चिनाउनेगरी अघि बढ्न खेलाडीहरुलाई आग्रह गरे ।
थाहा नगरपालिका शिक्षा तथा खेलकुद शाखाको आयोजनामा भएको कार्यक्रमको उद्घाटन थाहा नगरपालिका खेलकुद विकास समितिका संयोजक टिकाराम स्याङ्तानको अध्यक्षतामा भएको थियो । कार्यक्रममा नगर उपप्रमुख भरत गोपाली, प्रमुख प्रशासकीय अधिकृत कृष्ण गिरी, राजनीतिक दलका प्रतिनिधिहरु। जनप्रतिनिधिहरु, संघसंस्थाका प्रतिनिधि लगायतको उपस्थिति रहेको थियो ।
उद्घाटन कार्यक्रमकै बीचमा विभिन्न विद्यालयका विद्यार्थीहरुले मार्चपास गरेका थिए । प्रतियोगिताको रुपमा रहेको मार्चपासमा नाटेश्वर मावि टौखेल प्रथम, स्वच्छन्दभैरब मावि द्वितीय र पालुङ भ्याली हार्ट एकेडेमी तथा सुन्दरीदेवी मावि तृतीय भएका थिए ।
स्वास्थ्यका लागि खेलकुद, राष्ट्रको लागि खेलकुद भन्ने नाराका साथ शुरु प्रतियोगिता १ मंसिरसम्म चल्नेछ ।
यो नेपाली भाषाको अनलाइन पत्रिका हो । हामी तपाईमाझ खासगरी मकवानपुरकाे थाहा नगरपालिका र सँगसँगै तपाईंलाई काम लाग्ने देश-विदेशका समाचार र विचार प्रकाशन गर्छौं । सुझाव, समाचार र विज्ञापनका लागि सम्पर्क : ९७०५०७८९१०
