हालै आईपीओ बिक्री गरी बाँडफाँड गरेका मनकामना स्मार्ट लघुवित्त र युनियन लाइफ इन्स्योरेन्स कम्पनी लिमिटेडको सेयर १८ साउनदेखि धितोपत्र दोस्रो बजारमा कारोबारमा आउने भएको छ ।
नेप्सेमा मनकामना स्मार्टको रु. १०० अंकित दरका कुल १२ लाख ११ हजार ५०० कित्ता सूचीकृत भएको छ। जसमा संस्थापकको ८ लाख २२ हजार ५०० कित्ता र सर्वसाधारणको ३ लाख ८९ हजार कित्ता रहेका छन् ।
यो लघुवित्तलाई नेप्सेले एमकेएलबी कारोबार संकेत प्रदान गरेको छ भने पहिलो करोबारका लागि न्यूनतम रु. ११०.८४ देखि अधिकतम रु. ३३२.५२ ओपनिङ रेन्ज तोकेको छ ।
यो लघुवित्तले गत १७ असारदेखि २१ असारसम्म आईपीओ निष्कासन गरेको छ । आईपीओ बाँडफाँड २८ असारमा गरिएको थियो ।
यसैगरी युनियन लाइफको १०० अंकित दरका कुल २ करोड १५ लाख कित्ता सेयर नेप्सेमा सूचीकृत भएको छ। जसमा संस्थापकको १ करोड ५० लाख ५० हजार कित्ता र सर्वसाधारणको ६४ लाख ५० हजार कित्ता रहेका छन् ।
यो कम्पनीलाई नेप्सेले यूएलआई कारोबार संकेत प्रदान गरेको छ । पहिलो कारोबारका लागि भने न्यूनतम रु. ११५.१३ देखि रु.३४५.३९ ओपनिङ रेन्ज तोकिएको छ ।
युनियन लाइफको आईपीओ गत ३१ असारमा बाँडफाँड गरिएको थियो । यो कम्पनीले गत २४ असारदेखि २८ असारसम्म आईपीओ निष्कासन गरेको थियो ।
यो नेपाली भाषाको अनलाइन पत्रिका हो । हामी तपाईमाझ खासगरी मकवानपुरकाे थाहा नगरपालिका र सँगसँगै तपाईंलाई काम लाग्ने देश-विदेशका समाचार र विचार प्रकाशन गर्छौं । सुझाव, समाचार र विज्ञापनका लागि सम्पर्क : ९७०५०७८९१०
