इन्द्रसरोवर गाउँपालिकाले “अभिभावकको सहयोगमा बालबालिकाहरुलाई घरमा नै गराउन सकिने सिकाइ क्रियाकलापहरु” नामको पुस्तक वितरण गरेको छ । गाउँपालिकाले कोरोना भाइरसको कारण विद्यालय बन्द भएपछि प्रभावित बालबालिकाहरुलाई घरमै अभिभावकको सहयोगमा सिकाउन सकिने खालका क्रियाकलापहरुको बारेमा पुस्तक वितरण गरिएको गाउँपालिकाका शिक्षा शाखा प्रमुख तथा विद्यालय निरिक्षक धर्मानन्द पन्तले जानकारी दिए ।
गाउँपालिकाले विद्यालयको कक्षा १, २, ३ र पूर्व प्राथमिक तहका विद्यार्थीहरुका लागि यो समयमा घरमा नै बसेर सिक्न र सिकाउने उदेश्यले पाठ्यसामाग्री वितरण गरेको हो ।
गाउँपालिकाले बुधबार एक कार्यक्रमका बिच गाउँपालिकाको वडा नं २ कुलेखानी र वडा नं ३ सिस्नेरीका ११ वटा विद्यालयलाई पुस्तक वितरण गरेको छ । बाँकी रहेका ३ वटा वडाका विद्यालयलाई बिहिबार वितरण गरिने जनाएको छ । विद्यालयलाई वितरण गरिएको पुस्तक विद्यालयले अभिभावकहरुलाई वितरण गर्ने र अभिभावक मार्फत बालबालिकालाई सिकाउने विषय सँग समन्वय गर्नेछन् ।
बलामी, थाहा टाइम्स डटकमका संवाददाता हुन् । उनी मकवानपुरको इन्द्रसरोवर गाउँपालिकामा रहेर पत्रकारिता गरिरहेकी छिन् ।
