उत्तरी मकवानपुरको थाहा नगरपालिकाको सिमभञ्याङ, दामन लगायत डाँडापाखामा भारी हिमपात भएको छ । हिमपातपछि त्रिभुवन राजपथकाे सडकमा हिउँ जम्दा सवारी आवागमन बन्द भएकाे छ ।
गएराति वर्षा संगै हिमपात हुँदा त्रिभुवन राजपथ अवरुद्ध भएको जिल्ला प्रहरी कार्यलय मकवानपुरका प्रहरी प्रवक्ता जयश्वर रिमालले जानकारी दिए । २१ माघ विहान पालुङबाट हेटाैँडाका लागि छुटेका सवारीहरु हिउँका कारण अघि बढ्न नसकेपछि पालुङतर्फ नै फर्किएका छन् ।
पर्यटकीय क्षेत्र दामन-सिमभञ्याङसहित थाहाका कालीभञ्ज्याङ, केसरीभञ्ज्याङ, काेटथुम्की, देउराली लगायत अग्ला डाँडापाखामा हिउँ परेर सेताम्मे भएका छन् ।
थाहानगरमा यस वर्ष हिमपात भएकाे याे तेस्राे पटक हाे । यसपटक यसअघिकाे तुलनामा बढी हिउँ जमेकाे स्थानीय बासिन्दाले बताएका छन् । राती परेर राेकिएकाे हिमपात दामन आसपासमा अहिले फेरि शुरु भएकाे छ ।
यो नेपाली भाषाको अनलाइन पत्रिका हो । हामी तपाईमाझ खासगरी मकवानपुरकाे थाहा नगरपालिका र सँगसँगै तपाईंलाई काम लाग्ने देश-विदेशका समाचार र विचार प्रकाशन गर्छौं । सुझाव, समाचार र विज्ञापनका लागि सम्पर्क : ९७०५०७८९१०
