बडा दशैं २०७८ को अवसरमा थाहा नगरपालिका वडा नं. २ अन्तर्गत् टोलस्तरीय भलिवल प्रतियोगिता भएको छ । सोल्टु युवा क्लबको आयोजनामा २५ असोजबाट शुरु भएको प्रतियोगिता २७ असोजमा सम्पन्न भएको हो ।
वडाभरिका विभिन्न टोलका गरी ८ टिमले सहभागिता जनाएको प्रतियोगितामा फेदीगाउँको मेतोक पेमा युवा क्लबले उपाधि जितेर खसी पुरस्कार पाएको छ । फाइनलमा मेतोकले आयोजक सोल्टु युवा क्लबलाई उपविजेतामा सीमित गरेको थियो । उपविजेता भएको सोल्टु युवा क्लबले बोका पुरस्कार पाएको छ । प्रतियोगितामा देउरालीको देउराली युवा क्लब तृतीय भयो । उसले दुईवटा लोकल भाले पुरस्कार पायो ।
प्रमुख अतिथि थाहा नगरपालिका वडा नम्बर २ का वडाध्यक्ष गुप्तबहादुर कार्कीले विजेताहरुलाई पुरस्कार, शिल्ड, मेडल र प्रमाणपत्र प्रदान गरेका थिए । शंकर काकी, रुपक उप्रेती र राजाराम स्याङ्तानले प्रतियोगितामा निर्णायकको भूमिका निभाएका थिए । आयोजक क्लबका अध्यक्ष निशान कार्कीको सभाध्यक्षतामा प्रतियोगिताको समापन गरिएको थियो ।
गाउँमा पहिलोपटक टोलस्तरीय भलिवल प्रतियोगिता आयोजना गरिएको र यसले सामाजिक सद्भाव र दशैंको रौनकता बढाएको आयोजक सोल्टु युवा क्लबका सचिब रुपक कार्कीले बताए ।
यो नेपाली भाषाको अनलाइन पत्रिका हो । हामी तपाईमाझ खासगरी मकवानपुरकाे थाहा नगरपालिका र सँगसँगै तपाईंलाई काम लाग्ने देश-विदेशका समाचार, भिडियो, अडियो र विचार प्रकाशन गर्छौं । सुझाव, समाचार र विज्ञापनका लागि सम्पर्क : ९८५५०७८९१०(सम्पादक)
