मकवानपुर थाहा नगरपालिकाको पालुङ प्राथमिक स्वास्थ्य केन्द्रमा संचालन भएको दुईदिने निःशुल्क महिला स्वास्थ्य शिविरमा २ सय ५० जनाले सेवा लिएका छन् । शिविरमा महिलाहरुको पाठेघर खस्ने समस्या पाइएको स्वास्थ्यकर्मीहरुले बताए । थाहा नगरपालिका, बिङ यूथ र पालुङ जेसीजको सहकार्यमा माघ ३० र फागुन १ गतेसम्म संचालन भएको निःशुल्क महिला स्वास्थ्य शिविरमा महिलाहरुको पाठेघर खस्ने समस्याको विशेष उपचारलाई प्राथमिकता दिइएको पालुङ जेसीज वर्ष २०२१ का अध्यक्ष नवराज लामाले बताए । शिविरका क्रममा एकजनामा पाठेघरको मुखमा मासु पलाएको सफल उपचार, १२ जनामा पाठेघर खस्ने समस्या पत्ता लागेको छ ।
त्यस्तै रिङ पेसरी ८ जनामा राखिएको, १६० जना महिलामा प्रजनन् अंगहरुको संक्रमण देखिएको, ४ जनामा बाँझोपन र महिलाहरुमा तनाबसंग सम्बन्धीत समस्या १८ जनामा लगायतको समस्या देखिएको शिविरमा संलग्न चिकित्सकहरुले बताए । शिविरका अवसरमा उपचारको साथै स्वास्थ्य सम्बन्धी काउन्सिलिङ पनि गरिएको पालुङ जेसीज वर्ष २०२१ का कोषाध्यक्ष निरज रायमाझीले जानकारी दिए ।
शिविरमा विशेषज्ञ चिकित्सकहरुबाट निःशुल्क उपचारका साथै निःशुल्क औषधि पनि वितरण भएको थियो ।
यो नेपाली भाषाको अनलाइन पत्रिका हो । हामी तपाईमाझ खासगरी मकवानपुरकाे थाहा नगरपालिका र सँगसँगै तपाईंलाई काम लाग्ने देश-विदेशका समाचार र विचार प्रकाशन गर्छौं । सुझाव, समाचार र विज्ञापनका लागि सम्पर्क : ९७०५०७८९१०
