थाहानगरमा विद्यार्थीले छुट्टै परीक्षा दिनु नपर्ने, विद्यालयले नै मूल्याङ्कन गर्ने (सूचना र मापदण्डसहित)
आगामी १ असारबाट शैक्षिक सत्र सञ्चालन गरिने

कोरोना महामारीबीच थाहा नगरपालिकामा विद्यालय तहअन्तर्गत कक्षा एकदेखि नौसम्मको वार्षिक परीक्षा हुन्छ कि हुँदैन भन्ने अन्यौलता जारी रहेको बेला नगर शिक्षा शाखाले उक्त अन्यौलतालाई २४ जेठमा समाप्त पारिदिएको छ ।

नगर शिक्षा अधिकारी शोभाकर रेग्मीले नगरका सम्पूर्ण सामुदायिक तथा संस्थागत विद्यार्थीहरुलाई २४ जेठमा विद्यार्थी मूल्याङ्कनसम्बन्धी परिपत्र गरेसँगै अन्यौलता हटेको हो । नगर शिक्षा अधिकारी रेग्मीका अनुसार कक्षा ८ बाहेक अन्य कक्षाहरुको विद्यार्थी मूल्याङ्कनको लागि एक मापदण्ड तयार पारिएको छ र सोबमोजिम विद्यालयहरुले  मूल्याङ्कन गरी आगामी १ असारबाट नयाँ शैक्षिक सत्र शुरु गर्नुपर्नेछ । त्यसैगरी कक्षा ८ को हकमा भने विषयगत मूल्याङ्कन फाराम र मार्कलेजर बनाई कक्षा शिक्षक, परीक्षा संयोजक र प्रधानाध्यापकबाट प्रमाणित गरी सोको प्रति नतीजा प्रकाशनअगावै नगरपालिका शिक्षा शाखामा अनिवार्य पेश गर्नुपर्नेछ । 

नगर शिक्षा शाखाले ‘थाहा नगरपालिका अन्तर्गत सम्पूर्ण सामुदायिक तथा संस्थागत विद्यालयहरुले कक्षा १–७ र कक्षा ९ सम्मको बार्षिक परीक्षा २०७७ का लागि सैद्धान्तिक अङ्कको मूल्याङ्कन गर्ने सम्बन्धमा हालको कोभिड–१९ महामारीको कारण विद्यार्थीहरुको भौतिक उपस्थिति गराई परीक्षा लिने अवस्था नरहेको’ जनाएको छ । 

नगर शिक्षा शाखाले विद्यालयहरुमा परिपत्र गरेको कक्षा ८ को मूल्याङ्कनमा विभिन्न मापदण्डहरु निर्धारण गरिएको छ । जसअन्तर्गत आवधिक मूल्याङ्कनअन्तर्गत त्रैमासिक परीक्षाको १० प्रतिशत र  अर्धवार्षिक परीक्षाको ३० प्रतिशत अङ्कमा मूल्याङ्कन हुनेछ । 

त्यसैगरी निरन्तर विद्यार्थी मूल्याङ्कन प्रणालीअन्तर्गत् परियोजना कार्य १० प्रतिशत, कक्षा सहभागिता र गृहकार्य १० प्रतिशत, हाजिरी ५ प्रतिशत, सिकाइ व्यवहारमा परिवर्तन ५ प्रतिशत, सिकाइसम्बद्ध सिर्जनात्मक कार्यमा १० प्रतिशत गरी ४० प्रतिशत मूल्याङ्कन हुनेछ । 

बाँकी २० प्रतिशत विद्यार्थीको थप बैकल्पिक मूल्याङ्कन गरिनेछ जसमा सह–क्रियाकलाप ५ प्रतिशत, मासिक र एकाइ परीक्षा १० प्रतिशत र अनुशासन ५ प्रतिशत रहनेछ । 

विद्यार्थी मूल्याङ्कनसम्बन्धी परिपत्र र मापदण्ड फाराम यो लिङ्कमा क्लिक गरेर हेर्न सकिन्छ । हेर्नुहोस् परिपत्र :