अघिल्लो वर्षको तुलनामा थाहा नगरपालिकाको आन्तरिक आम्दानी बढेको देखिएको छ । आर्थिक वर्ष २०७६/०७७ मा नगरको आन्तरिक आम्दानी रु. ४ करोड ९५ लाख ६० हजार रहेकोमा गत आर्थिक वर्ष २०७७/०७८ मा झण्डै साँढे तीन करोडले बढेर रु. साँढे ८ करोड आम्दानी भएको हो ।
आर्थिक वर्ष २०७७/७८ को असार मसान्तमा थाहा नगरपालिकाको आन्तरिक श्रोतबाट रु. ८ करोड ४६ लाख आम्दानी भएको नगरपालिकाका प्रमुख प्रशासकीय अधिकृत हरिलाल पुरीले जानकारी दिए । ‘हामीले अनुमान गरेभन्दा झण्डै साँढे तीन करोड बढी आम्दानी भएको छ, आगामी वर्ष अझै आम्दानी बढाउन सकिन्छ’ उनले भने । नगरपालिकाले गत आर्थिक वर्षमा आन्तरिकतर्फ रु. ५ करोड ५ लाख आम्दानी गर्ने लक्ष्य राखेको थियो ।
नगरपालिकाले सम्पत्ति कर, भूमि कर, बहाल कर, व्यवसाय कर, तरकारी निकासी कर, प्राकृतिक स्रोत निकासी, विज्ञापन कर, सेवा शुल्क दस्तुर लगायतबाट आम्दानी गरेको हो । नगरले मालपोत रजिष्ट्रेशनबाट मात्र रु. १ करोड ६७ लाख ८५ हजार ४७८ सङ्कलन गरेको छ ।
यो नेपाली भाषाको अनलाइन पत्रिका हो । हामी तपाईमाझ खासगरी मकवानपुरकाे थाहा नगरपालिका र सँगसँगै तपाईंलाई काम लाग्ने देश-विदेशका समाचार र विचार प्रकाशन गर्छौं । सुझाव, समाचार र विज्ञापनका लागि सम्पर्क : ९७०५०७८९१०
