मकवानपुरको थाहा नगरपालिकामा कोरोना भाइरस सङ्क्रमण भए–नभएको परीक्षण गर्न स्वास्थ्यकर्मी घरघरमै पुग्न थालेका छन् ।
नगरमा कोरोना सङ्क्रमण दर निकै बढेर स्थिति झण्डै नियन्त्रणबाहिर जान थालेपछि पछिल्लो समय स्वास्थ्यकर्मीहरु घरघरमै पुगेर परीक्षण थालेको थाहा नगरपालिका स्वास्थ्य शाखा प्रमुख मेघराज बलामीले बताए ।
स्वास्थ्यकर्मीहरुले बिहीबार थाहाको वडा नम्बर ६ मा घरघरमा पुगेर कोरोनासँग मिल्दोजुल्दो लक्षण भएका व्यक्तिहरुको परीक्षण गरेको ६ नम्बर वडाअध्यक्ष शशिधर सुवेदीले बताए । त्यसैगरी, बिहीबार नै थाहाको ८ नम्बर वडाका विभिन्न स्थानमा स्वास्थ्यकर्मीको टोली पुगेर बिरामीको कोरोना परीक्षण गरिएको छ । बिहीबार ८ नम्बर वडाको देविस्थान र लामचौरमा पुगेर स्वाब लिइएको वडा अध्यक्ष टीकाराम रुम्बाले जानकारी दिए ।
थाहा नगरको पछिल्लो कोरोना सङ्क्रमण विवरण अद्यावधिक भइरहेको र केहीबेरमा सार्वजनिक हुने थाहा नगरपालिकाले जनाएको छ ।
यो नेपाली भाषाको अनलाइन पत्रिका हो । हामी तपाईमाझ खासगरी मकवानपुरकाे थाहा नगरपालिका र सँगसँगै तपाईंलाई काम लाग्ने देश-विदेशका समाचार, भिडियो, अडियो र विचार प्रकाशन गर्छौं । सुझाव, समाचार र विज्ञापनका लागि सम्पर्क : ९८५५०७८९१०(सम्पादक)
