मकवानपुर थाहा नगरपालिकाको आयोजनामा १४ जेठबाट हुने राष्ट्रपति रनिङ शिल्ड प्रतियोगिता तथा प्रथम मेयर कप भलिबल प्रतियोगिताको तयारी पूरा भएको छ । १३ जेठमा नगरपालिकामा पत्रकार सम्मेलन गरी नगरपालिकाले यस्तो जानकारी दिएको हो ।
नगरस्तरिय अन्तर माध्यमिक तहका संस्थागत ४ र सामुदायिक ११ गरी जम्मा १५ वटा विद्यालयको सहभागीता रहने प्रतियोगिता १४ जेठ बिहान ११ बजे जनकल्याण माध्यमिक विद्यालयको प्राङ्गणमा उद्घाटन हुने कायृक्रम तय भएको छ । प्रतियोगिताको लागि शिक्षा शाखा प्रमुख शोभाकर रेग्मीको संयोजकत्वमा १ बाल सदस्य सहित ७ जनाको खेल सञ्चालन समिती गठन भएको छ । प्रतियोगिताको लागि ४ लाख रुपैयाँको लागत अनुमान गरिएको छ । बालबालिकाको शिक्षाको साथसाथै अतिरिक्त क्रियाकलापमा समेत निपुण बनाइ स्थानिय तथा राष्ट्रिय खेलाडी उत्पादन गर्ने उदेश्यले प्रतियोगिताको आयोजना गरिएको प्रतियोगिता सञ्चालन समितिका संयोजक रेग्मीले पत्रकार सम्मेलनमा बताए ।
मेयर कप भलिबल प्रतियोगिता छात्र छात्रा अन्तर्गत मार्चपास तथा मेयर कप र राष्ट्रपति रनिङ शिल्ड खेलकुद प्रतियोगिता अन्तर्गत छात्र छात्रा दौड, छात्र दौड, रिले दौड, हाइजम्प, लङ्जम्प, त्रिपल जम्प, सटपुटलगायतका खेलहरु हुनेछन् । मार्चपास तथा मेयरकप भलिबल प्रतियोगिताको अंक राष्ट्रपति रनिङ शिल्ड खेलकुद प्रतियोगितामा जोडिने समेत पत्रकार सम्मेलनमा जानकारी गराइएको छ । प्रतियोगिता १४ देखि १६ गतेसम्म सञ्चालन हुने छ ।
प्रतियोगितामा मेयरकप भलिबल प्रतियोगितामा प्रथमलाई १५ हजार, कप, मेडल र प्रमाणपत्र, द्वितीयलाई १० हजार कप, मेडल र प्रमाणपत्र र तृतीयलाई ५ हजार, कप, मेडल र प्रमाणपत्र प्रदान गरिने छ । यस्तै राष्ट्रपति रनिङ शिल्ड खेलकुद प्रतियोगितामा प्रथमलाई २० हजार, शिल्ड, मेडल, प्रमाणपत्र, द्वितीयलाई १५ हजार, शिल्ड, मेडल, प्रमाणपत्र र तृतीयलाई १० हजार, शिल्ड, मेडल, प्रमाणपत्र प्रदान गरिने जनाइएको छ ।
खेलमा विद्यालयले यस शैक्षिक सत्रमा भर्ना भएका विद्यार्थीलाई मात्र सहभागी गराउनु पर्ने तर २०७५ सालमा एसइइ दिएका विद्यार्थीलाई सहभागी गराउन नपाउने भएको छ । पत्रकार सम्मेलनमा नगरस्तरिय खेलकुद विकास समितिका संयोजक राजेश के सी, स्वयंसेवक खेलकुद प्रशिक्षक राजिव स्याङ्तान, प्रतियोगिता संचालन समितीका सदस्यहरु सुरेन्द्रमान प्रधान, सानोभाइ कार्की, सदस्य सचिव अनिल लामिछाने र विभिन्न संचारमाध्यमका पत्रकारहरुको सहभागिता रहेको थियोे ।
बलामी, थाहा टाइम्स डटकमका संवाददाता हुन् । उनी मकवानपुरको इन्द्रसरोवर गाउँपालिकामा रहेर पत्रकारिता गरिरहेकी छिन् ।
-1717941855.jpg)