थाहानगरका अपाङ्गता भएकालाई सीपमुलक तालिम

मकवानपुर थाहा नगरपालिकाका १३ जना अपाङ्गता भएकाहरुले सीपमुलक तालीम लिएका छन् ।  नगरपालिकाको सामाजिक विकास शाखाको आयोजनामा भएको स्वरोजगार मुलक तालीममा उनीहरुले  बाँसको मुडा बनाउन सिकेका हुन् । 

थाहानगरको शिखरकोटमा रहेको विकास घरमा सात दिनसम्म संचालन भएको तालिम १९ असारमा सकिएको छ । थाहा नगरपालिका सामाजिक विकास शाखाका संयोजक तथा थाहा नगरपालिका वडा नं. ११ का वडा अध्यक्ष किरणमान बलको सभाध्यक्षतामा भएको समापन कार्यक्रममा तालिम लिएर यसको सदुपयोग गर्न सिपसिकेकाहरुलाई अनुरोध गरे । स्थानीय सरकारको बजेटबाट संचालन भएको तालिमले फरक क्षमता भएकाहरको आम्दानकिो बाटो खोलेको बताए । तालिममा सिकेको सिपलाई व्यवसायिकरण गरिदिनका लागि नगरपालिका सदैभ सकरात्मक रहेको संयोजक बलको भनाइ थियो । 
  
कार्यक्रममा अपांगता भएका व्यक्तिहरुको क्षमता तथा सिपमा थप नयाँ उर्जा दिनका लागि सीपमुलक तालीम आयोजना गरिएको नगरपालिकाका सामाजिक विकास शाखा प्रमूख अनिल लामिछानेले बताए । नगरपालिकाले अघिल्लो वर्ष पनि बाँसको मुडा बनाउने तालिम गराएको थियो ।  
कार्यक्रममा थाहा नगरपालिकाका महिला, बालबालिका तथा ज्येष्ठ नागरिक शाखाकी प्रमुख शशीकला सम्बाहाम्फे, थाहा नगरपालिका वडा नं ४ का सदस्य सोनिया सुनारलगायतको उपस्थिति रहेको थियो । तालिमका सहभागीहरुलाई रामचन्द्र राईले सात दिनसम्म सीप सिकाएका थिए ।