मकवानपुरको थाहानगर स्थित दामनमा ‘ग्रे साईडेड थ्रस’ नामको नयाँ चरा फेला परेको छ । यो विश्वमै दुर्लभ चरा हो । २४ सेन्टिमिटर लामो हुने उक्त चराको आँखीभौं सेतो तथा शरीरको कोखा तथा पेट खैरो हुन्छ । नयाँ प्रमाणित भएको उक्त चराको नेपाली नामाकरण भइ सकेको छैन ।
‘प्रकृतिका साथीहरु’ नामक संस्थाका चरा संरक्षण अधिकृत सोम जिसीले गत पुसमा उक्त चरा देखेर तस्बिर खिचेका थिए । वरिष्ठ चराविद्हरु डा. हेम सागर बराल र क्यारोल इन्स्किप लगायतले उक्त चरा नयाँ प्रजाति हुन सक्ने सुझाएपछि प्रमाणीकरणका लागि राष्ट्रिय निकुन्ज तथा वन्यजन्तु संरक्षण विभाग पठाइएको थियो ।
‘विभागले उक्त चरा नेपालका लागि नयाँ भनेर प्रमाणित गरेको छ,ְ’ प्रकृतीका साथीहरु संस्थाका कार्यकारी निर्देशक राजु आचार्यले भने । चरा पहिचानका लागि विभागका इकोलोजिष्ट लक्ष्मण पौड्यालले विज्ञहरुसँग बैठक राखेर परामर्श गरेका थिए । यो समेत नेपालमा पाइने चरा प्रजातिको संख्या ८७९ पुगेको छ ।
नेपाललगायत उक्त चरा भारत, चीन, म्यानमार, लाओस र थाइल्याण्डमा अभिलेख गरिएको छ । (इ-कान्तिपुरबाट)
