थाहा आन्दोलनका प्रणेता स्व. रुपचन्द्र विष्टको २२ औं स्मृति दिवस ७ असारमा थाहा नगरपालिकाको शिखरकोटस्थित विकास घरमा एक कार्यक्रमको आयोजना गरी मनाइएको छ ।
थाहा नगरपालिकाको आयोजनामा कार्यक्रम भएको हो । थाहा नगरपालिकाका प्रमुख लवशेर विष्टको अध्यक्षतामा भएको कार्यक्रममा स्व. विष्टको विकास घरको प्राङ्गणमा रहेको पूर्ण कदको शालिकमा माल्यार्पण गरिएको थियो ।
कार्यक्रममा बोल्दै थाहा नगरपालिकाका प्रमुख विष्टले स्व.रुपचन्द्र विष्टको स्मरण गर्दै स्व. विष्ट समाजको लागि भगवानसरह रहेको बताए । रुपचन्द्र विष्ट व्यक्ति भन्दा बढी विचार भएको तर्क गर्दै उनले थाहा जगाउँने क्रममा विष्टले आफ्नो परिवारको समेत परवाह नगरेको बताए ।
त्यसैगरी थाहा नगरपालिकाका उपप्रमुख खड्गबहादुर गोपालीले रुपचन्द्र विष्टले गरेको निष्पक्ष सक्रियतको अभ्यासमा अहिलेको पुस्ता लाग्न नसकेको गुनासो गरे । उपप्रमुख गोपालीले रुपचन्द्रले देखाएको बाटोमा हिँड्न सके सबैको कल्याण हुनेमा जोड दिए ।
कार्यक्रममा जनकल्याण उच्च माविका प्राचार्य सानोभाइ कार्कीले रुपचन्द्र विष्टले शिक्षा विकासको क्षेत्रमा महत्वपूर्ण योगदान दिएको उल्लेख गरे । थाहा–३ का वडा अध्यक्ष राजेश केसी आफैमा बिहङ्गम उदाहरण भएको बताए । उनले आफै काम गरेर अरुलाई प्रेरणा दिने व्यक्तित्वको रुपमा विष्टको चित्रण गरे ।
त्यसैगरी, ज्योति रायमाझीले स्व. विष्टको जीवनीबाट सिकेर समाज विकासको लागि सबैले योगदान गर्नुपर्नेमा जोड दिए ।
